奇雲迪布尼離隊已成定局？哥帥回應耐人尋味

曼城中場大腦奇雲迪布尼將於明夏約滿，不時傳出佢將會離隊，「藍月亮」領隊哥迪奧拿近日再次被問到呢位33歲比利時國腳會否續約，由以往有信心留住佢，到現時改口答：「唔知道。」睇嚟今季好可能係奇雲迪布尼最後1季效力曼城。

由於奇雲迪布尼即將約滿，英國傳媒關注佢會否續約，曼城出戰歐聯對士砵亭前夕，記者問哥迪奧拿，曼城董事局同奇雲迪布尼傾續約有冇新進展，哥帥直接話唔知，不禁令人懷疑雙方談判已經破裂。

事實上，奇雲迪布尼早於今夏已表明有興趣去沙特阿拉伯搵食，因為當地球會開出嘅薪酬非常吸引，「藍月亮」管理層可能都唔想阻佢去掘金。加上奇雲迪布尼近年經常受傷，最近1次上陣已經係9月中歐聯對國際米蘭，曼城會方亦唔想高薪留住1位「玻璃腳」。