奇云迪布尼离队已成定局？哥帅回应耐人寻味

曼城中场大脑奇云迪布尼将于明夏约满，不时传出佢将会离队，“蓝月亮”领队哥迪奥拿近日再次被问到呢位33岁比利时国脚会否续约，由以往有信心留住佢，到现时改口答：“唔知道。”睇嚟今季好可能系奇云迪布尼最后1季效力曼城。

由于奇云迪布尼即将约满，英国传媒关注佢会否续约，曼城出战欧联对士砵亭前夕，记者问哥迪奥拿，曼城董事局同奇云迪布尼倾续约有冇新进展，哥帅直接话唔知，不禁令人怀疑双方谈判已经破裂。

事实上，奇云迪布尼早于今夏已表明有兴趣去沙特阿拉伯搵食，因为当地球会开出嘅薪酬非常吸引，“蓝月亮”管理层可能都唔想阻佢去掘金。加上奇云迪布尼近年经常受伤，最近1次上阵已经系9月中欧联对国际米兰，曼城会方亦唔想高薪留住1位“玻璃脚”。