【有片】摩连奴跪草失败仆直　控诉土超劲黑暗

摩连奴去到边都有话题，今季转战土超执教费伦巴治，日前一场土超作客特拉布宗又有新闻；场波费伦巴治作客险胜3比2，完场后61岁嘅摩dad兴奋跪草失败仆直，之后佢控诉土超VAR太黑暗，仲话“如果早知我唔会嚟土耳其”。

呢场波都几峰回路转，费伦巴治一度领先两球，但球证喺5分钟内连判两个12码畀特拉布宗，摩连奴当堂焫著，但抗议无效，球证同VAR维持原判，费伦巴治被追和2比2，直至完场补时102分钟苏夫恩岩拉伯特攻入绝杀球，费伦巴治险胜3比2，赢过无数比赛嘅摩连奴忘形庆祝，先至有跪草失败仆直呢一幕。

摩连奴跪草失败仆直片段：

https://www.instagram.com/the18soccer/p/DB7NQHNzeHx/?img_index=2　

“寸王”赛后接受访问时馀怒未消，表示自己不但要同强敌周旋，仲要同系统对抗：“有人话我听呢度系咁，我之前都唔信，但情况比我想像嘅更差，对手已经好强，仲要同整个系统对抗，所以我要咁样庆祝，我好嬲介绍我嚟土超嗰条友，佢讲啲唔讲啲，如果佢讲清楚，我可能唔会嚟呢度。”