曼聯球員希望雲佬留任　做溝通橋樑

再過兩場，曼聯看守領隊雲尼斯達萊就會退位，由新主教練魯賓艾摩廉接手，據報曼聯球員對「雲佬」依依不捨，希望佢留任，作為球員同新帥溝通嘅橋樑。

48歲嘅「雲佬」今夏回巢擔任助教，坦哈格被辭退後出任看守領隊，佢唔想畀人話「篤背脊」而拒絕接任主帥一職，會方就向士砵亭挖走魯賓艾摩廉過檔執教。

自從「雲佬」擔任助教以來，受到曼聯球員擁戴，早前坦哈格仍在任時已有消息透露，球員更信任「雲佬」，坦哈格某程度已被架空，直至近期擔任看守領隊，球隊表現確實有所好轉，證明「雲佬」獲得球員一致支持。

「雲佬」受歡迎原因，係曼聯球員好欣賞其溝通方式，因此大家都希望「雲佬」繼續以某種身份留任。

新任主帥艾摩廉將會帶同士砵亭教練班底集體過檔，至於佢會否接受雲尼斯達萊加入，就要等兩人會面後決定，與此同時，曼聯會方亦希望另一助教、功勳名將費查繼續留任，因為費查在一隊同青訓營之間有重要角色。