尼马踢亚冠杯再受伤　后备席失控大发脾气

巴西球星尼马再受伤患折磨！上年因伤长抖超过1年嘅尼马，周二(5日)凌晨喺亚冠精英杯踢复出第2仗，比赛尾段疑拉伤大腿肌肉，再面临长达2个月养伤期。尼马又受伤后心情激动，返到后备席狂掟水樽同护胫，对自体唔争气非常失望。

尼马上年因膝部十字韧带撕裂，抖咗369日后喺上场亚冠杯复出，由于要等1月先可以喺沙特联赛注册，周二亚冠杯对艾斯迪格拿系佢复出第2场，尼马58分钟后备上阵，但踢咗唔够半个钟头，喺一次加速后突然按住右脚大腿，并且要提早退下火线。

尼马伤出后心情激动，将除落嚟嘅护胫掟走，又怒掷水樽泄忿，希拉尔喺呢场比赛凭阿历山大米祖域连中三元，最终大胜3比0。尼马完场后喺社交网表示：“我依家要做检查，希望唔系好严重，养伤1年后经常会出现呢啲问题，医生已经警告过我，所以我好小心......”

据巴西传媒报道，尼马可能系大腿肌肉拉伤，但要检查睇下有冇影响肌腱，而就算系最轻微嘅第一级拉伤，养伤期预计要1个半月至2个月，考虑到尼马嘅伤患史同依家身体情况，希拉尔多数会保守治疗，尼马或面临至少2个月养伤期。