富咸補時入2球反勝賓福特　威爾遜怪腳入金球

周二(5日)凌晨英超賽事，富咸主場憑「後備殺手」哈利威爾遜喺補時連入2球，戲劇性2比1反勝賓福特。哈利威爾遜追平嘅入波，係跳起凌空用腳外檔怪腳射入，賓福特領隊法蘭克賽後都話個入波「射100次得1球會入」！

富咸今場佔盡優勢，全場錄得26次攻門，但遲遲入唔到波之餘，仲喺24分鐘被真拿達率先攻陷。富咸82分鐘換入哈利威爾遜，呢位威爾斯前鋒喺補時2分鐘，接應傳中攝近柱用「怪腳」挑入；去到補時7分鐘更頭槌「絕殺」，助富咸反敗為勝。

賓福特領隊法蘭克賽後失望表示：「今場差距好細，富咸踢得更好係值得贏波，但當你作客去到尾仲領先1比0，防守係值得一讚。富咸最後瘋狂進攻，哈利威爾遜嘅控球一流，追平嗰個入波嘅角度，畀你射100球只會有1個係入波。」