巴神相隔1701日再戰意甲　踢6分鐘食黃牌

周二(5日)凌晨意甲，2支下游球隊交鋒，帕爾馬主場對熱拿亞成為傳媒焦點，因為巴洛迪利早前以自由身加盟熱拿亞，今仗首次上陣，亦係呢位34歲意大利前鋒相隔1701日之後，再次踢意甲，佢保持「腦殘」作風，後備上陣踢咗6分鐘，就食黃牌，但「巴神」勝在好腳頭，協助熱拿亞贏1比0，結束連續8場聯賽不勝困局。

巴洛迪利今夏離開土耳其球隊阿達納鐵路後「失業」，幾乎提早掛靴，幸好上月底獲熱拿亞招攬，雙方簽約至今年6月。「巴神」上場意甲只係做觀眾，睇住球隊不敵費倫天拿，今仗獲教練基拿甸奴加入大軍名單，擔任後備。

戰至79分鐘，熱拿亞憑前鋒賓拿蒙迪射入打開紀錄，巴洛迪利喺86分鐘後備上陣，可能佢太心急想爭取表現，反而喺補時犯規，被球證出示黃牌警告，幸好無阻熱拿亞贏波，升上尾4，暫時脫離降班區，巴洛迪利回歸意甲，總算有好開始。