蒙特復操　紅魔3位傷兵有望齊上陣迎新帥

曼聯傷兵問題開始改善，根據英國《曼徹斯特晚報》報道，養傷超過1個月嘅中場美臣蒙特已經全面復操，加上因傷缺陣多時嘅2位後衞杜維爾馬拉西亞、蘭尼約羅亦好得七七八八，3人有望喺國際賽期後復出，踢英超作客葉士域治，迎接新帥魯賓艾摩廉第1場領軍。

美臣蒙特自9月底英超對熱刺之後，就一直養傷，呢位25歲英格蘭國腳現時已經可以參加操練，但為安全起見，未來2場賽事歐霸盃對PAOK、英超對李斯特城，都唔使預佢，預料等到國際賽期後，11月25日凌晨英超作客葉士域治，先至會復出。該仗將會係曼聯新領隊魯賓艾摩廉第1場執教，美臣蒙特必須把握機會爭取表現。

此外，杜維爾馬拉西亞、蘭尼約羅早前亦已經復操，但因為狀態不足，仍然未能披甲，估計2人同樣會等到對葉士域治，先至正式為紅魔鬼候命。