解決唔到？肥安認定麥巴比係皇馬衰落原因

皇家馬德里今夏簽入法國前鋒基利安麥巴比，表面上睇係如虎添翼，不過球隊表現不進反退，依家喺西甲落後巴塞隆拿9分。據西班牙媒體《Relevo》報道，教練安察洛堤已認定麥巴比係問題所在，不過要解決就唔係咁易。

報道指安察洛堤同教練團隊分析後，認為麥巴比喺無球情況下，跑動同協防能力差係皇馬衰落原因，就以「國家打吡」吞巴塞隆拿4蛋一仗為例，麥巴比全場跑動只有8公里，遠低於正常踢足90分鐘球員嘅10公里，而且佢欠缺嘅防守工作要由隊友分擔，亦令全隊發揮受到影響，加上麥巴比今季10場聯賽入6球嘅數據，唔足以彌補防守上嘅缺陷。

更大嘅問題係，雖然知道麥巴比係衰落嘅原因，但安察洛堤冇可能將佢擺喺後備席，同時又唔想全面改變上季贏歐聯冠軍嘅陣式，依家處於兩難局面。