一個原因　「新伊巴」拒絕投曼聯

士砵亭教練魯賓艾摩廉將成為曼聯新領隊，盛傳有意帶埋射手基奧基尼斯過檔，但根據葡萄牙《紀錄報》爆料，呢位有「新伊巴謙莫域」之稱嘅瑞典國腳，並冇興趣成「魔」，因為佢認為曼聯內部太混亂，寧願繼續效力士砵亭。

魯賓艾摩廉早前表示，基奧基尼斯毀約金達1億歐元(約8.46億港元)，曼聯應該冇可能明年1月冬季轉會市場收購佢。《紀錄報》指呢位26歲前鋒對於加盟曼聯嗤之以鼻，就算真係要離開士砵亭，亦唔會選擇曼聯，因為紅魔鬼近年太過混亂。

事實上，基奧基尼斯早前被傳媒問到會唔會加盟曼聯，佢立即否認：「同艾摩廉一齊去曼聯？我唔知道，我喺士砵亭踢得好開心，冇諗過其他事情，我只係為艾摩廉離隊感到難過，祝佢未來一切順利。」基奧基尼斯為士砵亭累積上陣65場射入59球及23次助攻，盛傳阿仙奴都有意收購佢。