安素失正選　歐洲兩大豪門趁機挖角

車路士天價中場安素費南迪斯今季狀態低迷，已失去正選位置，甚至傳出會方計劃出售呢位23歲阿根廷國腳。根據英國《太陽報》爆料，巴塞隆拿、國際米蘭都有意簽入安素費南迪斯，但由於佢身價昂貴，可能會先提出借用。

安素費南迪斯今季為車路士各項賽事上陣13次，冇入波亦冇助攻，逐漸被領隊馬利斯卡棄用，近3場英超都係擔任後備。代替安素正選位置嘅20歲新星羅美奧拉維亞，有穩定發揮，令安素嘅重要性進一步下降，加上車路士本身已有人滿之患，放走安素並唔出奇。

巴塞隆拿、國際米蘭最大機會出手簽安素費南迪斯，其中巴塞可能賣走法蘭基迪莊，需要搵替代人選，安素屬於唔錯選擇。至於國米傳統上係阿根廷球員「樂園」，現時隊內有3位阿根廷兵，包括隊長拿達路馬天尼斯，想簽埋安素壯大實力。