舒克斯超重明靠害　坦哈格死唔眼閉

曼聯今季攻力疲弱，10輪聯賽僅入9球，新加盟嘅約舒亞舒克斯首輪入波後就再冇貨交，據報原來呢位荷蘭國腳剛加盟時體重超標，而且態度散漫，坦哈格根本唔想要佢，但佢係英力士簽番嚟只能硬食，最終坦哈格受連累落台，真係死唔眼閉。

舒克斯係英力士管理團隊喺博洛尼亞簽番嚟，轉會費高達4,250萬鎊（約4.25億港元），認為佢潛力巨大，不過呢位23歲前鋒實際表現在水準之下，多次浪費機會，英國傳媒為此追查原因，卒之發現原來佢體重唔合格同態度有問題。

據報舒克斯剛加盟時，體重超標1英石(約6.35公斤)，而且態度懶散，坦哈格根本唔想用佢。舒克斯今夏代表荷蘭在歐國盃上陣僅2分鐘，結果佢並未提前向曼聯報到，而選擇繼續放假，就算曼聯去到洛杉磯集訓，而佢剛好亦喺洛杉磯，都冇同隊友見面。

舒克斯喺曼聯表現唔理想，佢話自己後墮後前鋒，踢法唔啱，但實際上佢跑動少兼搶波唔積極，上場對車路士84分鐘後備上陣，在速度上仍然輸畀韋斯利科芬拿，證明佢喺曼聯踢得差唔係冇原因。