舒克斯超重明靠害　坦哈格死唔眼闭

曼联今季攻力疲弱，10轮联赛仅入9球，新加盟嘅约舒亚舒克斯首轮入波后就再冇货交，据报原来呢位荷兰国脚刚加盟时体重超标，而且态度散漫，坦哈格根本唔想要佢，但佢系英力士签番嚟只能硬食，最终坦哈格受连累落台，真系死唔眼闭。

舒克斯系英力士管理团队喺博洛尼亚签番嚟，转会费高达4,250万镑（约4.25亿港元），认为佢潜力巨大，不过呢位23岁前锋实际表现在水准之下，多次浪费机会，英国传媒为此追查原因，卒之发现原来佢体重唔合格同态度有问题。

据报舒克斯刚加盟时，体重超标1英石(约6.35公斤)，而且态度懒散，坦哈格根本唔想用佢。舒克斯今夏代表荷兰在欧国杯上阵仅2分钟，结果佢并未提前向曼联报到，而选择继续放假，就算曼联去到洛杉矶集训，而佢刚好亦喺洛杉矶，都冇同队友见面。

舒克斯喺曼联表现唔理想，佢话自己后堕后前锋，踢法唔啱，但实际上佢跑动少兼抢波唔积极，上场对车路士84分钟后备上阵，在速度上仍然输畀韦斯利科芬拿，证明佢喺曼联踢得差唔系冇原因。