曼聯有對手　巴塞力斟基奧基尼斯

當大家討論曼聯新帥魯賓艾摩廉打算帶埋愛將基奧基尼斯過檔，另邊廂巴塞隆拿已經出手，據報巴塞體育總監迪高打算斟介該位瑞典射手，長遠為羅拔利雲度夫斯基接班，將會同士砵亭展開談判。

葡萄牙傳媒報道，基奧基尼斯係現時歐洲最受注目前鋒之一，受歐洲各豪門垂青，巴塞係其中之一，士砵亭同球員之間有協議，如果有6,000萬至7,000萬歐元報價出現，士砵亭就會放人。

據報如果超過一間球會斟介，基奧基尼斯轉會費有機會增至1億歐元，不過巴塞有信心可以用6,000萬至7,000萬歐元，甚至更低價錢簽入該射手，因為巴塞同士砵亭之間早有多宗球員轉會斟介同交易，包括士砵亭曾睇中巴塞嘅洛基費拉拿，仲有去年由巴塞轉投士砵亭嘅法蘭斯高查卡奧，可見兩隊之間關係密切，巴塞獲得基奧基尼斯優先購買權不足為奇。