C朗打破入球荒　艾納斯成功報仇大炒艾阿恩

周三(6日)凌晨亞冠精英盃，C朗打破3場入球荒，協助艾納斯主場以5比1大勝上屆冠軍艾阿恩，取得亞冠3連勝，兼報番上屆8強被對手淘汰之仇。

賽前艾納斯近3場比賽不勝，原本形勢被睇淡，但今仗突然發威，開賽5分鐘就由塔利斯卡射入打開紀錄。呢支沙特阿拉伯勁旅攻勢一浪接一浪，前鋒沙迪奧文尼遠射被門將撲出之後，C朗補射入網，結束3場入球荒，同時係呢位39歲葡萄牙國腳職業生涯第908個入波。

阿聯酋球隊艾阿恩屋漏偏逢連夜雨，中堅卡度素擺烏龍，上半場落後3球。換邊之後，艾阿恩加進攻，56分鐘中場朴鎔宇遠射中柱彈出再省中門將賓圖入網，追番1球。

戰至比賽末段，艾納斯再由19歲巴西小將韋斯利及塔利斯卡各建一功，奠定5比1勝局，今屆亞冠精英盃4戰取得3勝1和，排西亞區第3位，落後希拉爾、吉達艾阿里2分。賽後C朗喺社交網簡單話兩個字：「大勝。」應該滿意自己今場表現。