賴斯受傷無緣鬥國米　奧迪加特隨隊有望復出

阿仙奴將於周四(7日)凌晨歐聯作客國際米蘭，兵工廠爆出不利消息，中場主力迪格蘭賴斯因為有傷在身，冇份入選大軍名單。不過，同時亦有好消息，養傷近2個月嘅隊長馬田奧迪加特可以隨隊出征，有望復出。

阿仙奴主帥阿迪達透露迪格蘭賴斯無法出戰國際米蘭：「賴斯受咗傷，將於周四(7日)接受進一步檢查，睇下可唔可以踢下場英超對車路士。」據悉呢位英格蘭國腳嘅傷勢並唔嚴重，阿迪達收起佢，只屬於預防性質。

另外，根據「轉會權威」記者羅曼諾(Fabrizio Romano)爆料，馬田奧迪加特有份隨隊出征，必要時或者會上陣。阿仙奴同國際米蘭今屆歐聯同樣3戰取得2勝1和，屬於勢均力敵之戰。