【有片】送超騎呢12碼　維拉慘負布魯日

周四(7日)凌晨歐聯出現罕見一幕，阿士東維拉中堅泰朗明斯喺作客布魯日一仗，禁區內騎呢用手執起門將開嘅波，被球證判罰12碼，維拉最終就係因呢次「送禮」慘輸0比1，今屆歐聯連勝斷纜。

頭3輪全勝嘅維拉，今場作客同布魯日互有攻守，關鍵時間出現喺51分鐘，當時維拉門將達米安馬天尼斯開龍門球輕輕踢橫，泰朗明斯隨手執起個波，諗住擺番喺小禁區重開，點知球證突然鳴笛判12碼，雲拿根操刀射入全場唯一入球，布魯日贏1比0完場。

泰朗明斯騎呢送12碼：https://twitter.com/i/status/1854239780248191463　

維拉領隊艾美利賽後表示：「明斯嘅犯錯實在太奇怪，係我足球生涯見過最嚴重嘅錯誤，人生入面只遇過1次，就係今日。」事實上，類似場面上季歐聯亦曾出現，阿仙奴中堅加比爾馬加希斯喺對拜仁慕尼黑一仗曾用手執起龍門球再擺定，但當時球證認為係「細路哥錯誤」，球隊亦無任何獲益，常理之下唔會喺歐聯吹罰，所以未判12碼。