巴塞轟5球創紀錄　費歷克為換羅拔仔「認錯」

西甲勁旅巴塞隆拿今季勢如破竹，周四(7日)凌晨歐聯作客5比2大破貝爾格萊德紅星，3連勝後升上第6位。巴塞今季各項賽事16場轟55球，係球會史上單季頭16場最高紀錄，打破50/51球季16場入54球成績，火力相當恐怖！

巴塞進攻行雲流水，恩尼高馬天尼斯13分鐘頭槌先開紀錄，紅星27分鐘追成平手，但羅拔利雲度夫斯基完半場前射入，為巴塞再度領先。下半場巴塞發力，「羅拔仔」、拉芬夏比洛尼同費明盧比斯分別建功，紅星尾段入多球仍要輸2比5。

「羅拔仔」近3場歐聯入5球後，職業生涯歐聯累積99個入波，教練費歷克賽後「認錯」，話自己太早喺78分鐘將佢換走：「我唔知道羅拔仔仲差1個就入歐聯100球，如果知道或者我唔會換佢走。羅拔仔第100球留番喺主場係咪更好？老實講我冇諗呢啲問題，只係想球員保持最好狀態，嚟緊又要應付西甲。」