傳尼馬同希拉爾解約　去美職重組MSN？

巴西球星尼馬上年登陸沙特阿拉伯，加盟1年幾以來只為希拉爾踢過7場比賽，最近再次受傷要抖3個星期後。據報希拉爾忍無可忍，有意1月同尼馬提前解約，呢位巴西前鋒盛傳有機會加盟國際邁亞密，同美斯、蘇亞雷斯重組「MSN」！

據巴西媒體《UOL》報道，希拉爾對尼馬一傷再傷已經心淡，希望1月份同尼馬達成解約協議，除咗想「踢走」佢份1.3億鎊年薪天價合約外，亦可以騰出名額再買球星加強實力。消息指希拉爾認為尼馬喺養傷期間態度並唔專業，無意再等佢復出。

尼馬如果同意解約，據報一係返巴甲重投母會山度士，另一方案係去美職搵食，傳聞國際邁亞密對佢有興趣，如果成事嘅話，尼馬將會同美斯、蘇亞雷斯再續前緣，重組14/15球季巴塞隆拿橫掃球壇嘅「MSN」夢幻鋒線。