曼城官司敗訴！向班捷文文迪巨額賠償

曼城球場外面臨連場官司，其中前法國球星班捷文文迪，早前控告曼城拖欠合共1,100萬鎊欠薪，周三(6日)獲勞工法庭判決勝訴，曼城將要向文迪發還「無理拖欠」嘅人工，估計金額達850萬鎊。

文迪3年前捲入強姦官司後，被曼城停職兼停薪直到約滿，後來呢位前法國國腳成功脫罪，佢就控告曼城拖欠佢22個月嘅人工。勞工法庭周三判文迪勝訴，認為佢當時已「準備好」同「願意」繼續練波同比賽，但被曼城無理阻止。

不過法官同時表示，文迪要求嘅1,100萬鎊欠薪唔會全數獲得，因為索償期當中有5個月時間，佢因違反保釋條款而被羈留，要經點算後先至計到曼城需要賠償嘅金額，初步估計約850萬鎊。現年30歲嘅文迪，目前效力法乙球會羅連安特。