志在必得！巴塞用巴西新星換約基利斯

巴塞隆拿今季大爆發，前鋒羅拔利雲度夫斯基狀態大勇係重要原因，不過呢位波蘭射手已經36歲，物色接班人係遲早要面對嘅問題。據報教練費歷克就睇中士砵亭前鋒約基利斯，雖然該瑞典前鋒身價不菲，但消息指巴塞準備用巴西前鋒域陀洛基做交換籌碼，令成事機會大增。

據葡萄牙《A Bola》報道，約基利斯合約雖然有1億歐元買斷條款，但士砵亭預算收到7,000萬歐元左右就會放人。巴塞認為今季葡超10場入16球嘅約基利斯，無論身材、射術都可以接替「羅拔仔」，教練費歷克已將呢位瑞典國腳視為收購頭號目標。

西班牙《每日體育報》消息指，巴塞目前財政問題未解決，冇能力用現金支付呢筆轉會費，所以打算用依家外借貝迪斯嘅域陀洛基做交換籌碼，巴塞上年花6,000萬歐元收購呢位19歲前鋒，如果士砵亭同意，巴塞只需補少量現金就可以完成交易。