利物浦物色阿諾特替身　睇中英格蘭新進國腳

利物浦同3大長老穆罕默德沙拿、華基爾雲迪積克、阿歷山大阿諾特續約遲遲未有進展，據報皇家馬德里有意喺1月份收購阿諾特。英國傳媒報道，利物浦亦做好兩手準備，預先物色阿諾特替身，而紐卡素嘅利夫拿文度就係心水人選。

據《Chronicle Live》報道，現年21歲嘅利夫拿文度今季表現出色，逐步取代老將捷比亞正選位置，今季10場聯賽踢足兼有7次正選，佢擁有出色嘅防守能力之餘，亦不時有能力助攻，早前亦曾獲英格蘭國家隊徵召，前途無限，預計依家轉會費約5,000萬鎊。

利物浦本身已有干拿巴特利呢位年輕右閘，不過利夫拿文度已經喺英超證明自己，對提升利物浦即時戰力更有幫助。阿諾特喺1月就可以同英超以外球會進行斟介，如果續約未有聲氣，利物浦可能要喺冬季提前放售。