曼联隔383日再尝欧战胜利　迪亚路金球抢镜

曼联喺欧洲赛终于赢波！周五(8日)凌晨欧霸杯赛事，曼联主场2比0击败希腊球会PAOK，相隔383日后再尝欧洲赛胜利滋味。“红魔鬼”今场功臣系新星阿密特迪亚路，呢位22岁翼锋获“解冻”后梅开二度，包括一记个人表演式金球，赛后获云尼斯达莱激赞。

迪亚路等咗1个月后复任正选，曼联上半场表现平淡，同PAOK闷和0比0，换边后加强压力终有收获，50分钟迪亚路接应般奴费南迪斯高波头槌顶入，去到77分钟更个人表演，喺前场截击后再扭过敌卫，推到禁区顶拉弓破门，过程相当精彩，带领曼联自2023年10月赢哥本哈根后，首次喺欧洲赛赢波。

曼联赢波后，欧霸杯4战1胜3和成绩升上第15位，迪亚路赛后表示：“我哋已经好耐冇喺欧洲赛赢波，今场胜仗非常关键，亦展示曼联系最好球队之一。今季我嘅运气唔系太好，所以好开心今场入2球，第2个入波系我训练嘅成果，我哋要积极去逼抢对手。”

看守领队云尼斯达莱亦大赞呢位科特迪瓦翼锋：“第2个入波系迪亚路自己制造，佢赢出自己嘅战斗，射出一个好靓嘅入球，金球！迪亚路系今场嘅锁匙人，2个入波当然最关键，而佢上半场都系球队表现最好几个之一，佢嘅训练一直好好，永远都会要求更多。”