人人有波入　車路士歐協聯派8蛋！

車路士喺歐協聯展現超班實力，周五(8日)凌晨主場對住阿美尼亞球隊FC諾亞，「藍戰士」一眾副選齊齊刷數據，最終8比0大勝而回，3戰全勝高踞榜首，為下場英超對阿仙奴注下強心針。

兩隊實力懸殊，車路士上半場就領先6球，安素費南迪斯交出3次助攻，艾達拉比奧約、馬克基奧都拎到加盟後第1個入球，祖奧菲歷斯(2球)、梅迪歷同阿素迪沙斯亦有進帳。下半場輪到尼干古發威入2球，湊成8比0大勝，創下歐協聯成立以來最大比數勝利紀錄。

車路士領隊馬利斯卡賽後表示：「唔好以為好易踢，足球係充滿驚喜，如果唔認真對待好容易出事，不過呢班球員非常專業同認真，今場展示出最正確嘅態度。」車路士下周一(11日)凌晨會喺主場迎戰阿仙奴，今場大勝對提高士氣大有幫助。