熱刺2比3不敵加拉塔沙雷　孫興民半場又被換

周五(8日)凌晨歐霸盃，熱刺作客加拉塔沙雷戰況激烈，最終10人應戰下輸2比3，今屆歐霸盃首敗後跌落第7位。南韓前鋒孫興民繼上場被換走大發脾氣後，今仗更加喺半場休息就被抽起，傳聞熱刺準備將佢出售。

熱刺上半場表現差勁，6分鐘就被尤奴斯艾根攻陷，雖然小將蘭克舒亞18分鐘追平，但主隊前鋒域陀奧森漢之後連入2球，加拉塔沙雷半場領先3比1。熱刺雖然落後，但半場期間竟然抽起孫興民，表現確實有起色，就算蘭克舒亞魯莽連拎兩張黃牌被逐，打少個嘅熱刺仍靠蘇蘭基入波追至2比3，只可惜最終返魂乏術輸波。

熱刺領隊普斯迪高路賽後表示：「呢場輸波係自己攞嚟，上半場其實可以踢得好簡單，但我哋選擇困難嘅做法，10人應戰下反而可以輕鬆打穿對手防線，上半場嘅表現令人好失望。」據《TBR Football》報道，熱刺決定唔會向明年約滿嘅孫興民開出新約，只會啟動佢合約內延長1年條款，目的係唔想佢以自由身轉會，但熱刺仍會聽取有冇合適報價，唔介意將呢位南韓球星賣走。