37歲柏度補時建奇功　拉素絕殺波圖

37歲西班牙名將柏度洛迪古斯寶刀未老，呢位前鋒喺周五(8日)凌晨歐霸盃，踢到補時2分鐘，射入致勝1球，協助拉素主場以2比1擊敗波圖，4戰全勝排榜首，難怪會方願意同呢位球壇長青樹續約至2026年。

意甲球隊拉素憑地利優勢，稍佔上風，踢到臨完上半場由中堅阿利斯奧羅馬洛尼頂入打開紀錄，換邊之後，葡超勁旅憑中場尤斯達基奧射入扳平。當以為雙方會握手言和，柏度洛迪古斯補時建奇功，接應伊薩辛傳中波，近門射入成2比1，協助拉素各項賽事5連勝。

柏度洛迪古斯愈老愈可愛，今季各項賽事上陣11場射入6球及2次助攻，包括連續3場歐霸盃入波，成為拉素獲得全勝嘅大功臣。賽後呢位老將更加講笑，聲稱自己應該重返西班牙國家隊。