阿積士港裔小將又入波　重演安東尼壯舉

周五(8日)凌晨歐霸盃，阿積士主場以5比0大勝特拉維夫馬卡比，擁有香港人血統嘅中場菲慈佔天樂射入1球，以21歲零125日成為自從安東尼馬菲奧斯之後，近3年最年輕連續3場主場上陣入波嘅阿積士球員。

阿積士佔有壓倒性優勢，由貝特蘭查奧爾、堅尼夫泰萊、高迪斯各入1球，上半場已領先3比0。換邊之後，波貝比勁射入網，呢位22歲荷蘭國腳今場有1球進帳及2次助攻。

戰至69分鐘，菲慈佔天樂喺禁區內轉身射成5比0，繼上場荷甲對燕豪芬入波之後，今仗又建功，並且連續3場主場有波入。

根據OPTA統計，曼聯翼鋒安東尼馬菲奧斯效力阿積士時期曾於2020年12月至2021年1月，連續3場主場有波入，菲慈佔天樂成為自呢位巴西腳之後，近3年最年輕連續3場主場上陣入波嘅阿積士球員，前途無可限量。

菲慈佔天樂嘅爸爸係蘇里南裔，媽媽係香港人，佢持有香港身份證，曾為荷蘭多個年齡級別小國腳出賽，以佢今季勇態，有望晉身荷蘭大國腳。