英格蘭點兵召兩新丁　卡斯利最後的禮物

英格蘭周四(7日)公布今個月國際賽大軍名單，修咸頓中堅哈活比里斯同紐卡素左閘利維斯賀爾首度入選，利物浦中場居迪斯鍾斯亦有望首次上陣，今次係看守領隊卡斯利離任前最後一次點兵，佢貫徹提拔U21球員作風，送畀小將最後的禮物。

英格蘭今次點兵，除祖迪比寧咸、哈利卡尼、布卡約沙卡、高爾彭馬等主力，亦繼續用安祖高美斯、基比斯韋特等卡斯利愛將，今次更選埋哈活比里斯同利維斯賀爾，卡斯利表示：「佢哋兩個今季有好多上陣時間，而且表現出高水平，我對佢哋都好熟悉。」

卡斯利帶隊踢埋對希臘同愛爾蘭兩場歐國聯後，看守領隊工作就會結束，帥印交畀德國名帥杜曹，卡斯利表示：「我有傳訊息去祝賀杜曹，而佢完全冇影響我今次點兵，好尊重我依家嘅工作。我唔會覺得難受，如果可以嘅話，我想準備一個最健全嘅陣容交畀佢接手。」