阿仙奴又傳噩耗　迪格蘭賴斯腳趾骨折

喺英超同歐聯2連敗嘅阿仙奴，又再傳出主力受傷噩耗，據報中場迪格蘭賴斯喺對紐卡素一仗受傷，檢查後發現腳趾骨折，一度連波砵都着唔到，不過消息指呢位英格蘭中場打算「頂硬上」，為阿仙奴出戰下場對車路士嘅英超大戰。

迪格蘭賴斯因傷缺席周中歐聯，當時領隊阿迪達透露：「賴斯上場(對紐卡素)受傷，雖然佢踢足全場，但之後覺得唔舒服，之後會再檢視情況。」據《每日電訊報》報道，迪格蘭賴斯嘅傷係腳趾骨折，不過佢打算忍痛上陣，亦有份入選最新一輪英格蘭大軍名單。

阿仙奴今季傷兵連連，隊長馬田奧迪加特喺國際賽受傷抖咗2個月，啱啱先至復出，依家又輪到迪格蘭賴斯「中招」，加上卡拉科利、富安健洋等「十字兵」預計要今個月國際賽後先復出，人腳掹掹緊。