港超聯 大埔主場唔放過標準流浪
2024年11月08日 19:05
東網電視
更多新聞短片
港超聯：大埔 vs 標準流浪
【東網按次收費直播】
「中銀人壽香港超級聯賽」周六（9日）上演兩場第8周賽事，頭場由「綠戰士」大埔坐鎮大埔運動場，迎戰近況回勇的標準流浪（on.cc東網周六下午3時按次收費直播）；至於尾場則爆發前列大戰，剛在「亞冠盃2」提早出局的理文，假主場將軍澳運動場惡鬥「4哥」九龍城。（on.cc東網周六晚上6時按次收費直播）
大埔上場聯賽賽和東方，成功將聯賽跨季不敗走勢增至20場，惟後防定海神針加比爾，因尾段兩黃一紅被逐，今場需要坐波監，主教練李志堅感到無奈：「對防守一定有影響，但足球比賽一定有球員會傷，或者攞牌，再睇吓點安排。」流浪上場對南區，差點全取3分，「堅Sir」大讚對手表現大有進步：「流浪上場踢得幾好，進攻好有耐性，反擊速度都好快，但我哋一定會全力爭勝。」值得一提，林樂賢已經傷愈，今場可以候命，而年青門將林志基則已因個人理由離隊。
加比爾停賽下，防中杜國榆（Remi）今場或要客串中堅，他坦言問題不大：「練波或者友誼賽，都有試過踢依個位，加上季初都多出場機會，自己狀態唔錯。」Remi強調今場面對舊東家流浪，會以3分為目標：「目前同東方咬得好緊，呢啲比賽一定要贏，我哋先有機會爭標。」
標準流浪上場臨完場前被冠忠南區逼和，痛失兩分，教練團成員之一的林嘉緯承認防守意識上，明顯需要一步加強。今場面對聯賽「2哥」大埔，「嘉緯」表示對手實力非同小可，會繼續專注先求穩守再伺機反擊：「大埔嘅外援前鋒表現出色，成日喺禁區製造到麻煩畀對手，尤其盧卡斯呢啲力量同身型上，好有優勢。希望可以搵到機會反擊，嘗試盡早爭取入波。」
球隊上場雖然未竟全功，是役倒戈舊會的前鋒雷仙奴認為，球隊已展現出爭勝心及鬥志，今場會繼續盡力為球隊爭分：「上場我哋有唔少入波機會，可惜尾段出現少少失誤，畀對手喺補時階段逼和。今場我哋絕對唔會大意，一定保持高度警惕，希望炮製到驚喜畀球迷睇！」
【兩隊預計正選陣容】
大埔
門將：94.謝家榮
後衞：26.李家豪 15.杜國榆 14.馬高斯山度士 44.韋法頓
中場：77.比迪高 6.羅振庭 16.陳肇鈞
前鋒：80.鍾偉強 11.盧卡斯 18.伊高沙托尼
標準流浪
門將：1.盧兆崎
後衞：4.梁煒烽 23.林堂真 13.菅沼駿哉 19.姚浩明
中場：11.巴拉克 5.林遼太 36.岡本玲仁
前鋒：37.張廣然 7.劉智樂 77.雷仙奴