曹亞文尼做罪人兼受傷　抖1個月

皇家馬德里上場歐聯1比3不敵AC米蘭，中場曹亞文尼2次犯錯，成為輸波罪人，表現備受批評。屋漏偏逢連夜雨，呢位24歲法國國腳該仗扭傷左腳足踝，預料需要休息1個月。

曹亞文尼上場踢完上半場就被換走，被西班牙傳媒形容係災難性演出，但原來佢其實受咗傷，先至被換走。根據「轉會權威」記者羅曼諾(Fabrizio Romano)爆料，曹亞文尼扭傷左腳足踝，將缺陣1個月，無緣為法國出戰嚟緊2場歐國聯對以色列、意大利，同時會錯過皇馬未來5場比賽，包括歐聯作客對利物浦。

皇馬近期連續受重挫，包括西甲以0比4大敗於宿敵巴塞隆拿腳下，歐聯輸畀AC米蘭，依家仲有曹亞文尼長抖，令球隊雪上加霜。