雲佬希望留隊　等緊艾摩廉電話

曼聯喺歐霸盃贏波，看守領隊雲尼斯達萊接手後戰績累積到2勝1和，不過佢嚟緊周日聯賽對李斯特城，將會係佢最後一場領軍，之後就要交棒畀新主帥魯賓艾摩廉，「雲佬」話等緊新主帥電話，先知點安排。

「雲佬」曾公開表態唔會「坐正」，只希望留喺教練團，但過咗咁耐魯賓艾摩廉都冇打畀佢，不過「雲佬」並無怨言，並對此表理解：「魯賓專注葡超對布拉加，而我亦專注聯賽對李斯特城，咁係好事，表明我哋都專注工作，但我會經常睇住部電話，等陣就睇睇。」

對於繼續留低嘅機會如何，「雲佬」表示：「依家我只諗住一件事，就係最後一場比賽做好過度工作，為球員提供所需一切，令佢哋發揮最佳表現，希望攞到重要3分，呢點先係最重要，老實講我唔會睇得太遠，比賽先係最重要。」

不過事實係「雲佬」同艾摩廉仲未有聯繫，「雲佬」指出：「等同對方通話後，我就知將來會點。」