麥巴比私下不滿肥安戰術　要做球隊核心

基利安麥巴比今夏降薪加盟皇家馬德里，一心諗住力爭生涯首個歐聯冠軍同金球獎，點知表現遠離預期，麥巴比再度化身「麥總」，私下向身邊朋友表示不滿安察洛堤戰術，仲話自己習慣做球隊核心嘅踢法。

連續喺國家打吡同歐聯失利，麥巴比嘅表現備受批評，數據亦反映佢表現唔多掂，至今為皇馬上陣15場，攻入8球當中有3個12碼，喺歐聯僅入1球，遠離「球王」級別水平。

西班牙傳媒報道，麥巴比私下向身邊朋友抱怨，唔滿意安察洛堤嘅戰術安排同戰術體系，仲話佢喺巴黎聖日耳門時，球隊以佢為核心，全隊都圍住佢轉，但嚟到皇馬完全唔係嗰回事。

皇馬未簽麥巴比前隊波好地地，上季連攞西甲、歐聯同西超盃3隻盃，但「麥總」一到隊波就立立亂，依家想贏一場普通比賽都有困難，估唔到「麥總」並無反省，仲認為係教練問題，佢嘅眼界真係世界級。