西班牙「巴塞幫」獨大　馬德里雙雄冇人入選

西班牙國家隊主帥富安迪公布出戰歐國聯新一期大軍名單，出現罕見情況，2支西甲勁旅皇馬及馬德里體育會都冇球員入選，反觀巴塞隆拿球員佔4人，成為「鬥牛兵團」最大勢力。

雖然皇馬、馬體會現時分別排西甲2、3位，但主要靠外援，皇馬原本仲有丹尼爾卡華積屬於西班牙常規國腳，但呢老將受傷長抖之後，唯一代表都冇埋。至於馬體會中堅拿洛文特、中場馬高斯洛蘭迪都落選。

西甲榜首巴塞隆拿成為「鬥牛兵團」大戶，4位入選球員包括前鋒拉明耶馬、中場柏迪、馬克卡沙度、丹尼爾奧莫，其中21歲新星馬克卡沙度屬於首次入選。原本另1位中場加維都可以入選，但會方認為佢剛傷愈不久，為免再次受傷，向西班牙足總提出免役，獲得批准。

西班牙將於11月16日凌晨歐國聯作客丹麥，3日之後主場對瑞士。