好波有好報　迪亞路將獲加薪2倍續約

英國各大傳媒報道，曼聯即將同翼鋒阿密特迪亞路續約5年，人工由現時2.9萬鎊周薪，大幅增加至9萬鎊(約90萬港元)周薪，果然踢好波有好報。

阿密特迪亞路將於明夏約滿，雖然紅魔鬼有權自動同佢續約1年，但會方仍然決定提早開出5年長約，希望綁實呢位22歲科特迪瓦國腳。

阿密特迪亞路2021年1月由阿特蘭大加盟曼聯後，雖然上陣機會唔多，甚至曾經被外借去格拉斯哥流浪及新特蘭，但今季回巢後有不俗表現，曾經當選8月曼聯最佳球員，上場歐霸盃更加射入2球，協助球隊以2比0擊敗PAOK，令會方下定決心同佢續約。

阿密特迪亞路好識賣口乖，佢早前話：「我喺曼聯過得好開心，希望長期留隊，為球隊創造歷史。」呢位新星仲話對於新領隊魯賓艾摩廉即將來臨，感到好興奮，非常期待同呢位葡萄牙名帥合作。