羅馬又準備換帥　文仙尼隨時接手

意甲球隊羅馬9月炒咗教練迪羅斯，搵來克羅地亞人祖歷執教，成績一樣冇起色，上場歐霸盃對比利時球隊聖基萊斯聯，都贏唔到，意大利傳媒指羅馬準備再次換帥，並已經同文仙尼接觸，希望邀請呢位前意大利國家隊領隊執掌帥印。

祖歷9月下旬接手執教羅馬首2場聯賽，係威係勢連接擊敗烏甸尼斯、威尼斯，但之後無以為繼，近5場聯賽只有1勝1和3負，當中近4場聯賽輸3場，僅排第12位，加上上場歐霸盃和波失分，祖歷下台壓力愈來愈大。

意大利傳媒指羅馬已經聯絡文仙尼，希望佢加盟拯救球隊，呢位59歲名帥上月底被沙特阿拉伯足總解約，現時屬於自由身可以隨時上任。文仙尼教波生涯捧過意甲、英超、歐國盃等多項冠軍，領軍能力出眾。

值得一提，文仙尼球員及教練生涯都效力過羅馬同市宿敵拉素，羅馬球迷接唔接受到呢位昔日死對頭加盟，成為疑問。