利物浦贏維拉帶出5分　麥亞里士打：我哋係冠軍熱門

利物浦贏波停不了！今季由施洛帶領嘅利物浦，周日(10日)凌晨英超主場2比0擊敗阿士東維拉，近12場賽事拎到11勝1和佳績，依家喺英超拋離曼城5分，喺歐聯亦排緊榜首，難怪阿歷斯麥亞里士打賽後信心爆棚：我哋係冠軍熱門！

氣勢如虹嘅利物浦今場踢得好爽，20分鐘一次快速反擊，穆罕默德沙拿單刀雖然被拉跌，但達雲紐尼斯後上射入。兩軍之後都有入波機會，直到84分鐘維拉後防解圍失誤，穆罕默德沙拿再次單刀並順利射入，1傳1射帶領利物浦贏2比0。

利物浦依家11場聯賽有9勝1和1負，領隊施洛成為2009年安察洛堤(車路士)後，第1個頭11場英超拎到9勝嘅領隊。阿歷斯麥亞里士打賽後被問到利物浦係咪冠軍熱門，呢位阿根廷中場表示：「我哋排榜首仲領先5分，一定係個指標，如果球季前問我，我唔會話我哋係爭標熱門，但依家睇落的確係，所以我哋要繼續努力同進步。」