皇馬大勝慘折3主將　米列達奧提早收咧

皇家馬德里喺周六(9日)西甲，憑雲尼斯奧斯祖利亞大演帽子戲法，主場4比0大勝奧沙辛拿，不過拎呢3分亦付出沉重代價，洛迪高高斯、艾達米列達奧同盧卡斯華斯基斯分別傷出，其中米列達奧更連續第2季經歷韌帶撕裂，今季提早收咧。

皇馬喺西甲同歐聯連輸2場後，今場贏波決心十足，上半場由雲尼斯奧斯同祖迪比寧咸各建一功領先2比0，雲尼斯奧斯下半場再入多2球完成「帽子戲法」，率領皇馬大勝4比0。不過皇馬今場有3主力先後因傷退下火線，而且傷勢都唔輕，代價極為沉重。

皇馬賽後發聲明，證實巴西中堅米列達奧膝頭前十字韌帶撕裂，將會進行手術根治，預計養傷期達9個月。西班牙傳媒報道，巴西前鋒洛迪高高斯因肌肉受傷，預計要抖到12月初，至於盧卡斯華斯基斯同樣肌肉出現問題，預計要抖3個星期。

教練安察洛堤賽後表示：「我哋踢得好好，完全控制比賽，最慘係上半場就連傷3個球員，情況好罕見。依家賽程實在太頻密，球員冇機會休息，佢哋好疲憊咁上陣，受傷風險自然大大增加。」