盡得爸爸真傳　「小韋亞」近4場意甲入3球

周日(10日)凌晨意甲「都靈打吡」，祖雲達斯主場以2比0擊敗拖連奴，「星二代」添莫菲韋亞射入1球，呢位24歲翼鋒近4場聯賽上陣有3球進帳及1次助攻，演出愈來愈搶鏡，果然盡得爸爸、前世界足球先生及金球獎得主韋亞嘅真傳。

開賽18分鐘，祖雲達斯就打開紀錄，安達亞甘比亞素左路快放入禁區起腳，被門將雲查米連高域沙域撲出，添莫菲韋亞補射入網。呢位美國國腳上季由里爾加盟祖雲達斯，首季聯賽30次披甲，都冇波入，但今季8次上陣已經入4球，進步極大，新教練莫達似乎擁有添莫菲韋亞嘅「說明書」。

戰至比賽末段，祖記2位新星合作，法蘭斯高干斯卡奧右路傳中，基倫耶迪斯飛頂入網，呢位土耳其國腳以19歲零189日成為意甲「都靈打吡」史上第3年輕入波嘅祖雲達斯球員。祖記取得聯賽2連勝，亦係今季意甲唯一不敗球隊。

同日另1場意甲，AC米蘭雖然有拉菲爾利亞奧梅開二度，以及譚美阿巴謙入波，但作客仍然被卡利亞里逼和3比3。