美斯頭槌破網都冇用　國際邁亞密季後賽出局

周日(10日)早上美職季後賽東岸首圈第3回合，國際邁亞密即使有球王美斯罕見以頭槌入波，但仍然主場以2比3不敵阿特蘭大聯，3局2勝賽制之下，總局數輸1比2被淘汰出局，意味呢支常規賽盟主已無緣總冠軍。

國際邁亞密首回合贏2比1，第2回合以輸番1比2，來到今場生死戰，呢支擁有多位前巴塞隆拿球星助陣嘅豪門，由馬迪亞斯洛查士喺開賽17分鐘入波打開紀。不過，之後形勢出現逆轉，阿特蘭大聯憑前鋒查馬泰亞尼梅開二度，反超前2比1。

戰至65分鐘，美斯搏到盡，以頭槌頂入扳平2比2，但防線太脆弱，被阿特蘭大聯中場巴托斯沙利斯攻入致勝1球，黯然出局。

美斯今季為國際邁亞密上陣25場射入23球，協助球隊以超班姿態奪得常規賽冠軍，備受睇好可以贏埋季後賽總冠軍。可惜呢位37歲阿根廷球王首度參加季後賽，遭到滑鐵盧，第1圈就玩完，提早結束今季賽事。