拜仁贏波一枝獨秀　高柏尼平隊史紀錄

周六(9日)德甲賽事，拜仁慕尼黑作客1比0擊敗聖保利，由於RB萊比錫、利華古遜等前列分子都失分，令拜仁喺榜首帶出5分，教練高柏尼更追平球會史上最佳開季成績。

拜仁今場控制戰局，狀態大勇嘅穆斯亞拿22分鐘轟入世界波，不過客隊之後未能再添入球，最終1比0小勝。今輪前列球隊連環失分，RB萊比錫被慕遜加柏悶和0比0，利華古遜亦被波琴絕地逼和1比1，拜仁成為今輪大贏家。

拜仁今季10場聯賽有8勝2和，追平哥迪奧拿(2013年)同施碧斯(1968年)保持嘅拜仁開季最佳成績紀錄(頭10輪聯賽)，高柏尼賽後表示：「我好珍惜呢場勝仗，當你睇到利華古遜、多蒙特失分，就知道德甲冇一場比賽係易踢，聖保利係支出色球隊，呢場勝仗非常重要。」