艾摩廉周一成“魔”　三招激活曼联

鲁宾艾摩廉将于周一(11日)正式成为曼联领队，佢已经对红魔鬼球员表现有一定了解，尤其球员入球数字偏低系佢最唔满意嘅地方，亦系球队成绩一落千丈嘅最大原因，据悉，鲁宾艾摩廉准备“艾3招”，希望改变球队文化及现时呆滞不前嘅局面，帮曼联尽快回复“魔性”。

第1招 禁般奴费南迪斯浪射

鲁宾艾摩廉认为中场队长般奴费南迪斯经常浪射，必须改变呢个坏习惯，否则将会出售佢，就算两人属于葡萄牙同胞，都冇面畀。

般奴费南迪斯今季水准非常飘忽，既可以贡献美妙助攻，但亦经常乱射门，导致球队失去控球权。般费今季英超32次射门只入1球，可见佢浪射情况非常严重。消息人士指鲁宾艾摩廉已经发现呢个问题，将会要求般费改变踢法，减少无谓射门，提升入球效率，如果做唔到，将会被打入冷宫，甚至出售。

事实上，鲁宾艾摩廉成为曼联新帅之后，好可能签入多位士砵亭爱将，明夏“大换血”放弃般奴费南迪斯，并唔出奇。

第2招 转踢进攻足球回复魔性

未计今轮对李斯特城，曼联联赛入9球排英超尾三，只比8球嘅水晶宫同7球嘅修咸顿多，入球转化率喺6.4%，即系射波转化成入波嘅比例极低，排尾二，黄金机会入球率19%，更排全个英超包尾。

艾摩廉要解决攻力问题，简单就系要彻底改变战术及球员进攻思维，从佢带领士砵亭欧联4比1大炒曼城睇到，佢嘅“343”或“3421”阵式或者可以为曼联带嚟转变，尤其今季新签嘅后卫马菲斯迪历特，同防守中场曼纽尔乌加迪都完全适应三后卫踢法，只要艾摩廉明确向球员指示战术方向，唔似坦哈格教咗2年半，混乱到班波都未知自己踢乜，咁就有机会重演费格逊当年“Attack! Attack!Attack!”嘅魔性。

第3招 U队寻宝激活懒散中生代

现年39岁嘅鲁宾艾摩廉，最锺意提拔年轻球员，据知佢已经问会方攞咗近两季U队球员名单深入研究，喺财政紧绌同冇实际买人话事权下，艾摩廉打算提升几名具潜力球员上一队，除咗增加球队活力，更为一班懒散嘅中生代，如拉舒福特及安东尼马菲奥斯等带来冲击。

有指红魔U18进攻中场占士史加隆及上季U21预备组射手艾芬韦治利，都系艾摩廉心仪嘅球员。当中艾芬韦治利今季已经被提升上一队，现时着36号波衫，今年4月曾经喺曼联大胜锡菲联4比2一役上阵。至于占士史加隆季初喺U18赛事食出大四喜，唔少球迷已经喺网上要求将佢提升上一队，增加球队侵略性。