艾摩廉亲自点名　乌加迪有运行

鲁宾艾摩廉听日就过档曼联接掌帅印，有葡萄牙传媒问佢，就快同曼联新兵曼纽尔乌加迪重聚睇法，艾摩廉大赞乌加迪好有天赋，好高兴喺曼联见番佢。

曼纽尔乌加迪于2021至23年效力士砵亭两个球季，当年佢由法马利卡奥来投，转会费650万欧元，正系由艾摩廉引入，两季共上阵85场入1球，协助球队赢得葡联杯。

2023年6月，巴黎圣日耳门触发6,000万欧元解约金签入乌加迪，该季上阵37场，赢得法甲同法足杯，今季以4,200万镑获曼联承接，依家艾摩廉亦跳槽执教曼联，兜一个大圈之后两师徒再度重聚。

对于重遇乌加迪，艾摩廉表示：“我执教过嘅所有乌拉圭球员都非常出色，呢个亦系我锺意佢哋嘅原因，乌加迪系个好有天赋嘅小子，仲有好大成长空间，好开心喺曼联见番佢。”

乌加迪喺曼联并非常规主力，至今上阵10次，不过艾摩廉已经嚟到，仲亲口点名乌加迪系“自己人”，预期将会成为艾摩廉体系嘅骨干之一。