笑話！VAR「認錯鞋」屈走入波　巴塞慘輸

周一(11日)凌晨西甲出現驚天誤判，巴塞隆拿作客0比1輸畀皇家蘇斯達一仗，羅拔利雲度夫斯基曾有入球被「老屈」作廢，原因係VAR同半自動越位系統「認錯鞋」！

賽前7連勝嘅巴塞隆拿，今仗13分鐘就由羅拔利雲度夫斯基入波，但西甲新引入嘅半自動越位系統出現畫面，判定「羅拔仔」鞋頭凸出而構成越位。不過重播以及3D影像顯示，所謂凸出嘅鞋頭，其實係屬於皇蘇守將，「羅拔仔」隻腳位置喺對手後面，而VAR團隊亦冇發現「認錯鞋」，結果造成呢次誤判。

巴塞入波被屈走後，33分鐘更被碧加攻陷，而缺少受傷嘅拉明耶馬，巴塞反攻乏力，最終0比1輸波。對於今次驚天誤判，西班牙媒體以「醜聞」、「打劫」嚟形容。

巴塞教練費歷克賽後表示：「我同球證講呢個判決係錯誤，但我哋只能夠接受，唔係球證嘅錯，我哋都係凡人，犯錯在所難免，今次係一個重大錯誤。」至於巴西翼鋒拉芬夏比洛尼就喺社交網貼「超長鞋頭」圖片，諷刺球證執法。