艾摩廉贏波告別葡超　簽證未批開工Hold住先

曼聯宣布新帥魯賓艾摩廉會喺周一(11日)正式開工，不過據英國《每日郵報》報道，呢位葡萄牙主帥仍未獲批工作證，暫時唔可以正式開工，但預計手續只係例行公事，唔會影響艾摩廉嘅備戰工作。

艾摩廉周一凌晨帶領士砵亭作客4比2擊敗布拉加，完美告別葡超，消息指佢會即刻飛去曼徹斯特「開工」，但報道指英國勞工部仍未批出工作證，艾摩廉理論上唔可以「正式」開工，包括主持操練、出席記者會等等，不過依家正值國際賽期，大部份球員都要返國家隊，影響唔大。

雖然艾摩廉名義上仲未可以開工，但佢仍然好多嘢要做，包括接受曼聯TV訪問，仲要搵屋同安排生活上各種細節，當然仲可以同曼聯管理層商談發展策略。曼聯下場聯賽會係11月25日作客葉士域治，呢場將係艾摩廉帶領曼聯嘅處子戰。