沙拿國際賽免役　同利物浦傾續約

利物浦同穆罕默德沙拿嘅續約事宜，嚟緊國際賽檔期將會明朗，據報今個國際賽檔期，沙拿獲得免役，毋須為埃及上陣，令佢可以留喺利物浦總部，同會方專心傾續約。

埃及今個國際賽檔期有兩場非國外賽事，分別係作客佛得角同主場對博茲瓦納，由於埃及在所屬小組4戰全勝提前出線，所以可以畀沙拿免役，等佢處理續約事宜。

報道指，沙拿希望同利物浦續約2年，個人條件未有披露，佢現時周薪為35萬鎊，雖然已屬利物浦頂薪，但仍然同沙特開出嘅條件冇得比，去年沙特豪門伊蒂哈德曾向沙拿報價，如果佢願意轉戰沙特，周薪可高達500萬鎊。

不過依家睇嚟，32歲嘅沙拿仍以留效利物浦為首選，獲埃及免役後並無選擇休息，而係留喺利物浦傾續約，誠意十足，之後就等利物浦有咩回應。