熱刺輸波被狂嘘　「肥普」怒睥倒米球迷

星期日(10日)英超賽事，熱刺主場意外1比2不敵葉士域治，送呢支升班球隊今季聯賽首勝。完場後熱刺主場球迷狂喝倒采，領隊普斯迪高路離場嗰陣，一度企定怒睥「倒米」球迷，賽後更表示會為輸波負上全部責任。

熱刺上場聯賽大勝阿士東維拉，估唔到主場對住弱旅葉士域治，上半場就連失2球，最終以1比2輸波，依家排聯賽第10位。完場後主場球迷不斷柴台，當普斯迪高路返球員通道嗰陣，懷疑聽到有球迷講出難聽嘅羞辱說話，呢位澳洲教頭即時停低怒睥看台，想搵出倒米嘅球迷，表現非常不滿。

普斯迪高路賽後表示：「輸波嘅終極責任喺我身上，同球員無關，今季嘅不穩表現由我負責。球迷有權覺得失望，正如我所講，教返好隊波係我嘅責任。」普斯迪高路同熱刺球迷嘅關係麻麻，上季佢就曾經公開炮轟熱刺球迷，因為想阻止死敵阿仙奴捧盃，公然要求熱刺輸畀曼城。