雲佬3勝1和「埋單」　同艾摩廉會面決定去留

曼聯新領隊魯賓艾摩廉周一(11日)上任，意味看守領隊雲尼斯達萊嘅歷史任務已經完結，佢執教4場比賽總計拎到3勝1和，成績相當理想，不過佢喺曼聯嘅未來仍然係問號，艾摩廉已表明到達曼徹斯特後，將同「雲佬」會面決定去留問題。

「雲佬」以主帥身份帶領曼聯最後一戰，3比0大勝李斯特城後，獲奧脫福球場球迷起立鼓掌致敬，呢位荷蘭名將賽後表示：「4場嘅任務完結，但未來之門仍然打開，好開心能夠同球迷分享呢個美妙時刻，非常多謝球迷嘅支持。」

據報艾摩廉將會帶同士砵亭5名教練一齊加盟曼聯，令「雲佬」留隊前景亮起紅燈，艾摩廉喺為士砵亭完成告別戰後透露：「依家講緊一個曼聯傳奇，佢做得好好，我星期一會同佢傾，之後就會交代一切事情，我嘅思路非常清晰，大家等多陣。」