香港隊　首度獲召　馬斐：冇諗過會入選

正備戰國際足球友誼賽的香港男子足球代表隊，周一（11日）下午於將軍澳足球訓練中心（FTC）展開操練，當中效力傑志的19歲前鋒馬斐首次獲徵召，則坦言本次入選大軍名單出乎其意料之外，會把握機會學習，期待為港隊作出貢獻。

19歲的馬斐過去多次入選港隊U20，對於首次躋身「大港腳」決選名單，他表示既緊張又興奮：「從來冇諗過自己會入到決選名單，我收到通知嘅時候興奮之餘都有啲緊張，好感恩有一個咁難得嘅機會，我會把握今次機會去學習同表現自己，好期待可以代表港隊上陣。」

上月在港隊U20友賽對廣西梅開二度的馬斐，今季未曾在聯賽上陣，決選名單公開後一度引起外界關注，他表示主帥韋斯活有留意到他近期表現，認為他具備潛力：「韋斯活睇咗我哋U20廣西場波，佢見到我嗰場入咗兩球，所以想畀機會我去試吓。代表到港隊係我一直以來嘅目標，我一定會盡力去踢，希望未來可以繼續入選。」對於即將到來的友賽，馬斐表示會專注於提升自己，爭取上陣時間，努力讓自己在賽場上展現出更自信及穩定的表現。