加拿祖拒絕慶祝　因為嬲咗曼聯球迷！

曼聯喺英超主場3比0大勝李斯特城，阿根廷新星阿歷真度加拿祖尾段入咗球世界波，不過佢入完波後拒絕慶祝，據隊長般奴費南迪斯透露，原來加拿祖因為不滿「魔迷」近期針對，所以唔想慶祝。

曼聯季初成績差勁，加拿祖就成為眾矢之的，球迷批評呢位20歲小將獨食兼經常浪費機會。加拿祖今仗拎到今季第3個聯賽入球，成為隊中首席射手，但佢入波後並冇「照慣例」去廣告版同球迷一齊慶祝，而係好冷靜咁自我激勵後，木口木面咁繼續比賽。

般奴費南迪斯賽後解開疑團：「今場係好日子，球員踢得好好，不過啲球迷好極端，1場波會捧到上天，1場波又會踩到地底泥。加拿祖今場入咗球靚波，但佢冇好似以前咁慶祝，因為佢覺得球迷對佢失去信心。我有叫加拿祖去慶祝，嗰啲『怨婦』永遠都會埋怨，但仲有好多球迷會欣賞同享受你嘅貢獻。」